معًا نُمكِّن أسر أطفال متلازمة داون

مع ميلاد كل طفل، بيتولد حلم وأمل في حياة طيبة ومستقبل أفضل. لكن للأسف، آلاف الأسر بتتحرم من الحلم ده لما بتكتشف إن طفلها من ذوي متلازمة داون ، وبتعيش بداله خوف واضطراب وفقد.

قصتنا بدأت مع علياء أحمد وطفلتها صوفي. في اللحظة اللي الدكتور فيها قرر يواسي علياء بدل ما يهنّيها بمولد بنتها ، هي قررت إنها هتغيّر العالم عشان خاطر صوفي. ومن هنا، اتولدت فكرة “نُمكِّن” عشان تكون النور اللي بيساعد كل أسرة في رحلتها.

إحنا مؤمنين إن الاختلاف مش أسوار بتمنع أطفالنا من الحياة ، لكن هو فرصة عشان نكتشف هما فعلاً قادرين على إيه. “نُمكِّن” كانت اللحظة اللي اتحوّل فيها خوف أمّ لأمل ، أمل إنها تساعد كل مقدم رعاية في الرحلة دي بإنه يكون موجود بالكامل في حياة طفله. هدفنا الأساسي إن أي أب أو أم يحسوا إنهم مش لوحدهم ، وإن فيه شبكة دعم قوية مستعدة تقدم الإرشاد والمساعدة.